Alweer biefstuk

Biefstuk oftewel steak is een van daai goed wat elke man dink hy weet hoe om dit die beste te braai of te bak, en die meeste mans is (soos gewoonlik) verkeerd.

Ek gaan nie weer deur die hele oefening gaan nie, maar vir my is daar twee of ala Salemo nee 3 belangrike goed wanneer jy steak braai.

1. Goeie vleis

2. Baie warm pan/kole

3. Moenie oorgaar maak nie

Ekself is nie 'n sous mens nie, ek hou van die smaak van vleis, en dieselfde gaan vir my vir die bygeregte, hou dit eenvoudig, 'n opgekookte aartappel en pampoen, nie iets wat die steak gaan oordonder nie.

Lekker eet

Potjie

Wat gebeur as jy te veel groente eet?

Jy begin gesigte sien.

Lekker naweek

Potjie

Asseblief tog somer kom nou

'n Nuwe gesig vir die Swartland

Die gesig van die Swartland was altyd koring, grasgroen in die winter wat tot goudgeel verander in die somer, en dan na oestyd so half barre stof geel van die koring stoppellande, maar in die laaste paar jare het daar 'n kanarie geel in die Swartland verskyn, lank voor die koring begin ryp word is daar geel blertse tussen die groen koring lande, kanola geel om presies te wees, en miskien is dit gepas nou dat mense meer margarien as botter eet dat kanola so tussen die koring groei.

Daar is natuurlik 'n ander geel in die winter in die Swartland, 'n heelwat ligter geel, ramnas is sy naam, en nie soort van ding wat mens aspris groei nie, ook nie die tiepe ding waarvan jy sal margarien maak nie, vra maar vir enige iemand wat al melk gedrink het waarvan die koeie ramnas geeet het, nie 'n smaak wat mense laat toustaan nie, glo my.

Lekker eet

Potjie

Engelse Les

Disappear - ingeval jy nie weet nie

Lekker eet
Potjie

My Eet in die Park droom

Die droom van my sal my in 'n 400km radius van Kaapstad neem na plekke soos, Beaufort West, Langebaan, Swellendam en Citrusdal. Die een ding wat die dorpe ingemeen het is dat daar 'n Nasionale Park of Wildernes gebied op hulle voorstoep is, en dis waar my droom begin.

Wat ek wil doen is om my gas stovie te pak en die Nasionale parke en wildernes gebiede besoek, en in elk een van hulle iets te kook van die omgewing, vis in Langebaan, miskien iets rook met rooibos in Citrusdal, skaap of springbok in Beaufort West, en bontebok met braamberries in Swellendam, julle kry die idée, MNET, SABC, enige iemand wat belangstel?

Lekker eet

Potjie

Om te droom

"My heart is afraid that it will have to suffer," the boy told the alchemist one night as they looked up at the moonless sky." Tell your heart that the fear of suffering is worse than the suffering itself. And that no heart has ever suffered when it goes in search of its dreams."

Die boonste aanhaling kom uit The Alchemist van Paulo Coelho, een van my gunsteling nie-kook boeke, en hoekom ek vanaand daaraan dink weet ek nie regtig nie, maar nou laat ek dit weer lees het ek aan drome begin dink, die meeste van my drome het met kos te doen.

Ek sal vandag julle 'n skrefie geen in een van my drome.

Die droom speel af in 'n klein dorpie, met huise ouer as die Kasteel in Kaapstad, olyf en suurlemoen bome, lavender en papawers en rose rooier as wat jy kan dink. Dan is daar die mark, met tafels vol kase en salami, haas en hoender lê styf teen kalkoene en eende, klein roos knoppies en 'n reenboog van peper korrels verlei jou om te koop, groente en vrugte wat net sowel 'n blomme rangskikking kon wees vra vir maaltye by groot tafels vol lag en wyn, ja dis in die land waar brood nog by die bakkery gekoop word, sigarette by die tabaconist en wyn orals, waar winkels in die middag sluit, en kos 'n godsdiens is, waar ek nie die taal verstaan nie, maar die mense wel, dis die Franse platteland, en dis 'n droom.

More deel ek 'n ander droom, miskien

Lekker eet

Potjie

Weskus O Weskus

Potjie

Sy’s verslaaf aan Tom en Jerry, maar cheer vir die kat

My vriend Karl, die een met die skewe blessie is verslaaf aan rolprente met interresante titels, ek is mal oor interresante "one liners", nie die komedie tiepe een lyners nie, maar daai een sin wat buite konteks miskien geen betekenis het nie, maar binne konteks die hele storie maak, sinne wat jou jare later nog bybly, lank na jy die storie vergeet het. Die titel hierbo kom uit vandag (15 Augustus) se Rapport, My Tyd, in die Voorsmaak rubriek met die title Dis kos vir 'n Leeu deur bib big joe.

Die resep wat hiemee saamgaan is een vir macaroni en kaas, iets wat ek laas op skool geëet het, en myself belowe het ek sal nooit weer eet nie, in so mate dat ek enige pasta koop, maar nie macaroni nie. In alle respek aan my ma, maar daai droë macaroni en witsous met skywe tamatie en chedder bo-op was nie iets wat ek noodwendig weer wil eet nie, maar ek moet bieg dat die resep van big big joe klink heel eetbaar, wel miskien bietjie meer as eetbaar, miskien selfs vrek lekker as jy my vra.

Lekker eet
Potjie

Met die maan gepla

Om darm iets van kos in die stuk te gooi sal ek maar begin met die woorde van die tema lied van 'n ou TV reeks, as ek reg onthou het Mynie Grove dit gesing, die naam kan ek egter nie onthou nie, maar dit gaan iets soos "Kaspaas lavaas, toe ons nog klein was, was die maan van kaas"

Toe my vrou vanaand roep om die maan te kom kyk (jammer die foto is nie te great nie, die maan is erens in die middle bo) toe dink ek aan my pa, hy het altyd gesê as jy na die sekel maan kyk en dit lê op sy rug, dan skep die maan, so dit beteken dis besig om laagwater te raak, as die maan se sekel vorentoe lê, dan gooi die maan die water terug, so dis besig om hoog water te word.

Ek dink die foto is op die draai van die gety geneem, want dit skep nog nie, en dit gooi ook nog nie.

Lekker eet
Potjie

‘n Dilemma van epidermiese proporsie

My vroulief het my gisteraand ingelig dat sy van Donderdag af saam met die helfte van haar familie by Weighless aansluit, en dat ek behoort ook, maar op die minste moet ek nou die lae vet, lae kilojule kos kook.

Nou bid jou aan ek skryf hier oor slaai en gestoomde vis, die mense sal mons dink die aliens het my kon vang en met iemand anders omgeruil wat min of meer soos ek lyk.

Nou hoe moet ek nou maak, as ek nie die kos gaan kook nie gaan my vrou tyd nodig he in die kombuis, en ons kombuis is te klein vir twee, en ek is boonop ook nie lus om in die spaarkamer te slaap nie, en ek gaan dan op die einde die enigste vettie wees, wel miskien nie die enigste een nie maar nogtans.

Enige voorstelle is baie welkom, ook die naam van 'n goeie slaappil, die krisis gee my slapelose nagte.

Lekker (di)eet

Potjie

Volstruis lewer pate

As man nou 'n ding soos 'n volstruis lewer raakloop kan jy net sowel verbeel die wêreld is jou oester en wild gaan, gryp 'n koppie room kaas of dubbel room (dis seker wat mens double cream in die soetste taal noem) kap 'n ui fyn, kap dan sommer bietjie tiemie by, en terwyl jy nou besig is kap sommer 'n knoffel huisie of twee ook fyn.

Skink nou vir jou 'n glas wyn en bedink die ding goed deur, miskien onthou jy van daai bottel Verlaque Balsamic Reduction (Fresh Raspberries) in die kas, dan haal jy hom ook sommer uit.

Vat daai yster pan van jou en gooi bietjie olyf olie in, braai die uie en knoffel tot sag, voeg die volstruis lewer by (so 350g) en braai tot bruin, voeg tiemie by en geur met sout en peper. Gooi bietjie van die balsamic reduction oor en braai tot gaar.

Laat lewer bietjie asfkoel, gooi in voedselverwerker, voeg room of roomkaas by en verwerk tot fyn, gooi in klein bakkies en sit in yskas vir ten minste 24 uur, as jy dit kan hou.

Lekker eet

Potjie

Maklikste Chinese ooit

Koop springrolls en chilie sous by Chinese winkel, braai in diep olie tot goud bruin, en impress almal met jou tuisgemaakte springrolls.




Moet vir niemand vertel nie.



Lekker eet

Potjie

Uit die veld (geslaan)

In die laaste jare het suurlemoensap en skil surings vervang in waterblommetjie bredie, en ek was altyd onder die indruk dat dit maar ons gewone luiheid is wat hierna gelei het.

Maar 'n tyd gelede lees ek 'n resep vir waterblommetjie bredie, en die skrywer van die artikel noem toe dat hy/sy nie meer surings in die hande kan kry nie, en ek begin toe wonder of surings aan die uitsterf is.





Toe ek dus die naweek tussen Stellenbosh en Malmesbury orals geel blommetjies langs die pad opmerk stop ek net daar en gaan kyk na die blomme wat teen 120km/h kompleet soos surings lyk, en tot my blydskap vind ek toe uit dat surings g'n aan die uitsterf is nie, mense is net bloot lui om in die veld te gaan stap en dit te pluk.


Waterblommetjie tyd is ook suring tyd in die Kaap, so stop jou motor, gaan stap in die veld en pluk surings, en maak waterblommetjie bredie soos jou ouma dit gemaak het, en vir so proesel van kleintyd eet sommer 'n handvol daar in die veld.


Lekker eet
Potjie